تقرير شامل مفصل عن السفر الى تايلاند بالصور – الجزء الثاني

دة الجزء الثاني من التقرير الشامل عن السفر الى تايلاند، قبل ما اتكلم عن مطار بانجكوك حابب اوضح ان بانجكوك فيها مطارين كبار واحد مخصص للرحلات الدولية وواحد مخصص للرحلات الداخلية.

مطار الرحلات الدولية اسمه: Suvarnabhumi Airport

مطار الرحلات الداخلية اسمه: Don Muang Airport

هنتكلم عن مطار Suvarnabhumi لان احنا طالعين من مصر

مطار بانجكوك

مش هتكلم بقي عن النضافة والجمال والاحترام لان دي بديهيات، هندخل علي المفيد علي طول. وانت علي الطيارة اطلب من المضيفة كارت وصول للاجانب، هتديك ورقة كدة فيها بيانات الوصول والسفر يا ريت تتسلا كدة وتملي الورقة دي وانت في الطيارة عشان هتحتاجها اول ما تنزل المطار فا توفر وقت.

• – اول حاجة بتقابلك هي إدارة الجوازات والهجرة او Immigration عشان يختملك الباسبور ختم دخول ويتأكد انك معاك فيزا دخول البلد وطبعا هيطلب منك كارت الوصول.
• – طيب طبعا انت بعد ما بتسلم الشنط بتاعتك وانت مسافر من مصر مش بتشوفها تاني غير لما توصل الدستينيشن الاخير او وجهتك الاخيرة اللي هي هنا مطار بانجكوك فا بتمشي مع العلامات اللي متعلقة ومكتوب عليها الامتعة او Baggage لغايت ما توصل علي مكان كبير فيه السيور بتاعت الشنط وطبعا بيبقي في كتيير جدا لان بيبقي في طيارات كتير نزلوا في نفس الوقت، طيب عشان تعرف انت شنطك هتنزل علي انهي سير هتلاقي في لوحة او شاشة كبيرة في النص مكتوب عليها رقم الرحلة وجاية منين ورقم السير عشان تروحلوا (خلي بالك انت جاي من الدوحة مش من القاهرة) لانك جاي من ترانزيت.
• – بعد ما تستلم الشنط بتخرج من بوابة الجمارك ولو مش معاك حاجة تتجمرك (ودة الطبيعي) بتعدي من بوابة مكتوب عليها في نطاق المسموح بيه او لا شيئ للجمرك (Nothing to Declare).
• – نيجي بقي للنقطة المهمة انت تمام وخرجت وعاوز تروح الاوتيل بس هيقابلك مشكلتين هتروح بايه؟ وهتدفع ازاي؟

هتدفع ازاي؟ قبل ما تخرج هتلاقي في شركات صرافة كتييرة جدا والناس واقفة بتغير عملة، انت طبعا معاك دولار امريكي (لو ربنا كرمك وعرفت تجيب دولار) هتروح تحول 100 دولار فقط عشان سعر التحويل في المطار بيبقي وحش جدا فا حول اللي يخرجك برة المطار ويوديك الاوتيل فقط.

لو انت معتمد اعتماد كلي علي الكريديت او الديبيت كارد، هتلاقي ماكينات صرف اّلي (ATM) لاكن خد بالك البنوك في تايلاند بتخصم من 150 الي 200 بات عمولة استخدام ماكينة، يعني لو هتسحب 5,000 بات هتلاقيه خصم منك 5,200 بات وطلعلك 5,000 بس. وهنا انصحك انك لو هتسحب تسحب مبلغ كبيير مرة واحدة يعني 10,000 معقول جدا.

• – طيب معانا فلوس وكله تمام هنروح  الاوتيل ازاي بقي؟

في كذا طريقة، ليموزين المطار، تاكسي، اوتوبيس عام، او ان الاوتيل اللي حاجز معاه عنده خدمة توصيل من المطار.

انصحك بالتاكسي العادي ابو عداد، لانك واخد رحلة طويلة ومعاك شنط سفر، لاكن لو حابب توفر ممكن تسأل عن الاوتوبيس وتقول للسواق ينزلك اقرب حتة للاوتيل بتاعك.

• – طيب او ما تيجي خارج هيتهافتوا عليك بتوع شركات السياحة وبتوع شركات الليموزين طبعا هتنفضلهم خالص بزوق وتخرج برة هتلاقي علامة مكتوب عليها تاكسي ميتر او تاكسي بالعداد، هتلاقي واحد قاعد جنب مكنة كدة هيديك ورقة من المكنة مكتوب عليها رقم الرصيف اللي هيجيلك عنده التاكسي وكمان بيانات السواق والعربية ورقم تليفونة (حاجة كدة خيال في النظام والتكنولوجيا)

طبعا ولا بقي سواقين يتخانقوا عليك ولا يقولك تاكسي يا بيه ولا تقعد تفاصل. اومال السواقيت دي بتكسب ايه انها تروح المطار وتقف في الدور وكدذة؟ بتكسب ان الحكومة عاملة 50 بات زيادة علي العداد وكمان في الطرق السريعة في محطات تحصيل رسوم برضه الزبون هو اللي بيدفعها، بس كدة.

5 دقايق وتلاقي التاكسي المخصص ليك واقف في الرصيف او اللين مستنيك تركب وتقوله اسم الاوتيل او الافضل تكون طابع الحجز بتاع الاوتيل لانه بيبقي مكتوب فيه العنوان بالتايلاندي.

Enjoy the Ride

الاوتيل

اول ما توصل للاوتيل تعمل تشيك ان وتعرف مواعيد الفطار وباسورد الواي فاي وتطلب من الاوتيل كام كارت فيه العنوان والبيانات بتاعت الاوتيل تخليهم معاك في جيبك. ولو لسة ما دفعتش فلوس الاوتيل تشوف هتدفع بالكارت او كاش بس ياريت ماتدفعش بالدولار لان الاوتيل هيغيرلك بسعر وحش جدا.

شوية نصايح عن النزول في الاوتيل عموما:

•  – حط الفلوس والباسبورات في خزنة الاوتيل، عشان لو لا قدر الله وقع منك حاجة او اتسرقت يبقي الفلوس والاوراق في امان، وخد معاك الفلوس اللي هتغطيك اليوم بيومة، وطبعا تاخد معاك كروت فيها بيانات الاوتيل لو حصل اي شيئ توقف تاكسي وتديله الكارت هيوديك الاوتيل وهناك تتصرف، ماتخافش ماحدش هيوقفك في الشارع ويقولك بطاقتك او باسبورك. ولو حصل ولونه مستحيل بكل بساطة هتقوله في الاوتيل وساعتها هيجي معاك الاوتيل عشان تجيبه، ده لو حصل.
• – في بعض الاوتيلات بتقدم خدمة تنقل النزلاء بعربيات الي اقرب شاطئ بمواعيد معينة، اسأل واعرف المواعيد.
• – ماتحجزش تاكسي من الاوتيل ولا رحلة من الاوتيل، لان الاوتيل بيبقي حاطط سعر غالي جدا.
• – وانت بتحجز الاوتيل ركز كويس مع الموقع بتاع الاوتيل، في اوتيلات كتيير بتبقي سعرها رخيص بس بعيدة عن كل حاجة هتلاقي نفسك بتتدفع اد كدة تاكسيهات ومواصلات.
• – لازم الاوتيل اللي هتحجزة يكون مكيف لان في اوتيلات كتيير رخيصة بس بمراوح وهنا التكييف اساسي الجو حر جدا.
• – لو انت مش بتحب الزحمة والاماكن المكتظة بالسياح ابعد عن الاماكن المشهورة واسكن جنبها.
• – لو مش فارق معاك الفطار او مش بتحب تصحي بدري احجز اوتيل من غير فطار هيفرق معاك جامد، بس لو معاك اطفال احجز بالفطار، الفطار في تايلاند ملوكي.

معلومات عامة عن تايلاند البلد

(ركز قوي فوي، هنا كل واحدة من دول بفلوس)

• – مكاتب الصرافة بتختلف في السعر من مكتب لمكتب في نفس الشارع، فا ماتغيرش من اول مكتب تشوفه انت اولي بكل مليم.
• – سعر الصرف قدام الجنيه المصري بيطلع وينزل بس عموما ال 4 بات ب 1 جنية. (هتكلم كل اللي جاي بالبات وانت تقسم علي 4 علي طول).
• – تايلاند بلد الفصال، ايوة الفصال ولما تفاصل فاصل ل تحت النص عشان توصل للنص في الاخر، يعني مثلا لو سالت علي حاجة وقالك 100 بات قوله 30 عشان في الاخر تاخدها ب 50
• – لو حاجة عجبتك عند محل ماتشتريهاش، استني في كذا محل تاني بيبيعوها اتقل عشان تاخد افضل سعر.
• – في سلسلة سوبر ماركت عالمية اسمها سيفن اليفن (711) وفي كمان فاميلي مارت (Family Mart) حاجة زي اون ذا رن كدة بس مع الفرق ودول في كل حتة وشغالين 24 ساعة 7 ايام، فيها كل اللي انت عاوزه وفيها كمان اكل سخن بتجيبه من التلاجة ويتسخن في الميكروويف عندهم.
• – هتحتاج خط تليفون (موبايل) عليه انترنت، عشان هتتصل بشركات سياحة وهتكلم سواقين وهتستخدم الانترنت وتشغل ال جي بي اس، في خطوط موبايل مخصصة للسياح هتلاقيها في 711 و Family Mart ب اسعار تبدا من 100 بات بيبقي عليها انترنت مفتوح واسعار مخفضة (خلي بالك بيطلبوا يشوفوا الباسبور).
• – اوبر Uber شغال في تايلاند وعاوز اقول مريح جدا والناس نضيفة وزوق، استخدمه في المشاوير الطويلة.
• – للاسف اوبر مش شغال في بوكيت، بس تفتكر هسيبك انا؟ عيب!  – سعادتك تايلاند عندها برنامج تاني زي اوبر كدة اسمه جراب Grab نزله من الاستور واستخدمه زي اوبر بالظبط ودة شغال في تايلاند كلها، خلي بالك هما بيقولو عليه كراب مش جراب.
• – تايلاند بقي بلد بتستخدم التكنولوجيا في كل حاجة. يعني مثلا تلاقي مكنة تحط فيها فلوس تقيسلك الضغط، ماكنة تملا منها ماية معدنية، ماكنة تجيب منها مناديل، ماكنة استغاثة تكلم الشرطة، كدة يعني 🙂
• – واحنا ماشين في التقرير هكتب نصايح عن كل حاجة بتعملها.

هسيبكم مع شوية صور:

تابعونا في الجزء الثالث هنتكلم عن تعمل ايه وتروح فين في تايلاند.