انا مصري وعاوز اسافر – استخراج جواز سفر

 بعد ما عرفنا هنبتدي ازاي وايه المطلوب تحضيره عشان اسافر في المقال الاول من سلسلة “انا مصري وعاوز اسافر” هنا هنغطي كل المعلومات اللي ممكن تحتاجها عشان تستخرج جواز سفر مصري ندخل في المفيد:

المكان: مصلحة الجوازات التابعة لعنوانك اللي موجود في البطاقة (وده لينك هتلاقي فيه كل الفروع) ودة الموقع الرسمي للمصلحة: www.moiegypt.gov.eg

الزمان: كل يوم ما عدا الجمعة والاجازات الرسمية (يعني السبت شغالبين) – من الساعة ٨ الصبح للساعة ٤ بعد الظهر

التكلفة: ١٣٥ جنيه مصري للجواز الجديد و ١٨٢٫٥ للبدل فاقد

المدة: ٣ ايام من يوم التقديم (مافيش مستعجل)

المطلوب:

١- البطاقة و صورتها او شهادة ميلاد مميكنه لو اقل من ١٦ سنة
٢- شهادة القيد الدراسي للطلبة او المؤهل الدراسي وصورته
٣- مستند التجنيد وصورته
٤- عدد ٣ صور شخصيه (٤X٦)حديثة، خلفيه بيضة، والودنين باينين
٥- السجل التجاري لأصحاب الاعمال وصورته

العملية:

١- تحضر الورق كله وقلم حبر ازرق في دوسيه وتطلع الساعة ٨:٠٠ الصبح علي المصلحة
٢- العسكري اللي علي الباب هيطلب منك البطاقة عشان يتأكد من العنوان ويسلمك استمارة مجانا
٣- هتملي الاستمارة (الوش الاول بس باقي الاستمارة للموظف) وتكوت كتبت اسمك بالانجليزي زي ما انت عوزة بالظبط بخط واضح (خد بالك من الاستهجاء) وتدخل للظابط رئيس الوحدة عشان يأشر عليها ويقولك شباك رقم كام.
٤- هتقف علي الشباك تسلم الاستمارة والصور ويضطلع علي الاصول ويستلم الصور والمبلغ (يا ريت يكون معاك فكة او تحضر المبلغ بالظبط) ويديك ايصال استلام مكتوب فيه يوم التسليم.
٥- يوم التسليم هتوريهم البطاقة وايصال الاستلام وغالبا التسليم بيكون بعد الساعة ١٢

شويه معلومات: 

– ممكن تستخرج جواز لوالدك او والدتك من غير ما يروحو ونفس الكلام مع اخواتك القصر وطبعا نفس الكلام مع اولادك.
– الاطفال ليهم جواز سفر زيك بالظبط (مافيش اضافة الطفل علي والدته) المهم يكون ليه شهادة ميلاد مميكنة.
– الزوجة لازم تجيب وثيقة الجواز لإضافة اسم زوجها وجنسيته
– مدة الجواز ٧ سنوات لا تجدد (لازم تطلع واحد جديد).

مبروك بقي معاك باسبور 🙂 عقبال ما تحط عليه ختم اول خروج، تابعونا في المقال اللي جاي عن اول سفرية 😉