انا مصري وعاوز اسافر – اول سفرية

 مبروك علي الباسبور الجديد، يلا بينا نسافر بقي نتفسح ونتعلم بس نسافر فين وليه وامتي؟ تعالي بقي نحكي في الموضوع دة لأنه موضوع كبير.

قبل ما نجاوب لازم نعرف كام حاجة مهمة جدا:

٠- انت عاوز تسافر ليه؟ فسحة؟ شغل؟ تعليم؟ (لازم يكون ليك اجابة محددة للسؤال دة)
١- اختيار البلد اللي هاتروحها دايما بيعتمد علي عنصرين (سهولة دخول البلد والتكلفة)
٢- في بلاد المعيشة فيها رخيصة بس الوصول لها مكلف زي بلاد جنوب شرق اسيا مثلا.
٣- ماتقدمش علي فيزا صعبة وانت عندك نقطة ضعف (او باسبورك فاضي) الا لو ليك ظروف خاصة تضمنلك الموافقة علي الفيزا.
٤- مش كل البلاد تتراح في كل الاوقات لازم تعرف عن الجو وإذا كان موسم ولا لأ.
٥- المعلومة اللي تعرفها بتساوي فلوس، يعني كل ما تعرف وتذاكر البلد اكتر هتعرف توفر اكتر.
٦- انت تقدر تعمل كل حاجة بنفسك ومش محتاج شركة سياحة لو عندك استعداد تتعب شوية وتوفر فلوس.

طيب نبتدي نشوف ممكن نروح فين؟

في الكام مقال اللي جايين هبتدي بسفر الفسحة وبعد ما نخلص نمسك سفر الشغل ثم سفر التعليم، هعمل تقسيم كدة من وجه نظري نابع من تجربتي:

١- بلاد البداية (ٍStarters)

– تركيا

– لبنان

– قبرص

– الاردن

– الامارات

٢- بلاد الاحتراف (Advanced)

– بلاد جنوب شرق اسيا (تايلاند، ماليزيا، اندونيسيا، سنغافورة، كامبوديا، الفلبين، فيتنام)

– جزء من بلاد الاتحاد الاوروبي (اليونان، التشيك، المانيا، هولندا، فرنسا، ايطاليا، اسبانيا، ايرلاندا، البرتغال، الدنمارك وبرجيكا، انجلترا وغيرهم)

٣- بلاد صعبة المنال (Extreme)

– الولايات المتحدة (امريكا)

– كندا

– استراليا

في بلاد كتير انا ماذكرتهاش يمكن عشان مش مشهورة كوجهة للسفر من مصر في نطاق الفسحة او ممكن اكون نسيتها، بس انا هشرح انا قسمت البلاد دي علي اي اساس، بحيث لو نسيت بلد انت تعرف تحطها في مكانها،  اولا بلاد البداية هي بلاد سهلة المنال سواء من حيث عنصرسهولة الدخول والوصول وكمان من حيث التكلفة، بلاد الاحتراف انا بنصح بيها تكون تاني سفرية مش اول سفريه واكيد اكثر تعقيدا في الدخول و في التكلفة ما عدا دول جنوب شرق اسيا لأن الدخول سهل جدا بس التكلفة مرتفعة. اما بلاد الاكستريم او صعبة المنال دي صعبة في العنصرين بس مش مستحيلة.

طيب يبقي لو اول سفرية ليك انصحك تختار بلد من بلاد البداية عشان هتعرف تروح بدون مشاكل وكمان بتكلفة معقولة جدا. (واسمك زفرت الباسبور 🙂 )

وطبعا لو اخترت تروح بلد من بلاد الاحتراف وخصوصا الاتحاد الاوروبي يفضل ماتقدمش علي الفيزا وانت باسبورك فاضي او ماسفرتش قبل كدة عشان هنرجع تاني لموضوع ان السفارة بيجيلها ناس كتير جدا وعاوزين ناس ما تعملش مشاكل، ف انت لو سافرت قبل كدة ورجعت ومافيش مشكلة دة بيشجعهم انهم يدولك الفيزا.

بلاد صعبة المنال دي بقي بتحتاج مجهود ومصاريف اكتر، بس ليها طريقتها.

عشان تختار صح لازم تذاكر البلد كويس قبل ما تبتدي تعمل اي حاجة عشان تشوف هتنفعك ولا لأ،

ازاي اذاكر البلد اللي هاروحها؟

انت محتاج تعرف المعلومات دي وافتكر اهم من الشغل ظبط الشغل وكل ما يكون عندك معلومات اكتر توفر وتتبسط اكتر:

– البلد دي فين علي الخريطة؟ (هتستخدم جوجل مابس)

– البلد دي الساعة فيها كام؟ كود البلد؟ نظام الحكم؟ المساحة؟ عدد السكان؟ الديانة السائدة؟ وغيرهم من المعلومات الاساسيه (هتستخدم صفحة البلد علي ويكيبيديا)

– البلد دي بتتراح امتي؟ (هتستخدم الموقع دة: www.besttimetogo.com)

– عرفت مفروض تروح امتي طب التذاكر بكام؟ (هتستخدم www.travelstart.com.eg)

– طب الاقامة هناك بكام؟ (هتستخدم www.booking.com)

– طب ايه الحاجات اللي بتتعمل هناك؟ (هتستخدم www.tripadvisor.com)

بونص: لازم تقرا تقاريرالعرب المسافرون من المنتديات وهتجبها من البحث في جوجل.

هسيبك بقي تشوف انت ناوي تختار انهي بلد وتذاكرها كويس عشان المقال اللي جاي هنتكلم علي اهم جزء في السفر “الفيزا” او البعبع 😉