(انا مصري وعاوز اسافر – الفيزا (ج١

 بعد ما اخترت البلد اللي هاتروحها وذاكرتها كويس من مقال اول سفرية من سلسلة “انا مصري وعاوز اسافر” دلوقتي وقت اهم مقالة في الموضوع “انا مصري وعاوز فيزا”.

بص بقي موضوع الفيزا مش بعبع ولا حاجة ومش صعب زي ما ناس كتير فاكرة بس القصة كلها نوع من المنطق وتظبيط كل شئ عشان يخدم نفس الهدف.

يعني القاعدة العامة الاولي لازم تبقي منطقي في ورقك وكلامك وترتيبك للسفرية، وتاني هقولك حط نفسك مكان المسؤل في السفارة لو كنت مقنع ومنطقي في كل شيئ مافيش بلد هترفضك حتي امريكا شخصيا (عن تجربة فعلية مع فيزة امريكا)، تاني، ماترحش السفارة وانت عندك نقطة ضعف، خلي ورقك كله مظبوط بدون كدب الدنيا هتمشي، ولو للأسف اضطريت انك تجمل الكلام يبقي تاخد بالمثل دة: “كدب مترتب ولا صدق منعكش“.

حلو قوي تعالي بقي زي ما قسمنا البلاد في المقال اللي فات هنقسم البلاد علي حسب موضوع الفيزا الي نوعين رئيسيين:

١- بلاد مش محتاجة فيزا مسبقة للمصرين:

في ٤٦ بلد ممكن تدخلهم بدون فيزا مسبقة، يعني ايه بدون فيزا مسبقة؟ يعني من غير ما تروح السفارة وتقدم باسبورك وورقك، تحجز طيران وتطلع علي طول بس لازم نفرق بين حاجتين:

– بلاد لا تطلب فيزا من الاساس ودي وانت داخل المطار بتاعهم بيختمولك ختم دخول او ختم تصريح بمدة معينة – ومابتدفعش حاجة

– بلاد بتطلب فيزا عند الوصول ودي وانت داخل المطار بتروح علي شباك الفيزا او الهجرة تتمم الاجرائات وتاخد الفيزا وانت هناك – وبتدفع رسوم الفيزا

طبعا في بلاد كتير من ال ٤٦ دول عمرك ما سمعت عنها وعمرك ما هتفكر تروحا ف انا مش هكتب عنها بس لو انت حابب تعرف بص علي اللينك دة،

طب ايه البلاد اللي ممكن تتراح من ٤٦ دول؟ هو دة المفيد:

١- ماليزيا: انا هعملها مقال لوحدها دي 😀 من اجمل البلاد اللي زرتها، بتاخد ختم تصريح لمدة ٩٠ يوم وانت داخل.

٢- هونج كونج: زي ماليزيا ٩٠ يوم وانت داخل.

٣- كامبوديا: فيزا ٣٠ يوم عند الوصول

٤- كوريا الجنوبية: ٩٠ يوم وانت داخل

٥- جزر المالديفز: فيزا ٣٠ يوم عند الوصول

٦- تانزانيا: فيزا عند الوصول

٧- اندونيسيا: فيزا عند الوصول لمدة ٣٠ يوم

مش ملاحظ حاجة؟ ايوة صح كل البلاد دي بعيدة جدا عن مصر! طب دة معناه ايه؟ معناه ان الطيران ليها هيبقي غالي (كل ما المسافة بعدت كل ما تكلفة الوصول عليت)، اه طب دي مشكلة مافيش حاجة كدة في القريب؟

طبعا فيه انت بس تؤمر خد دول:

١- المزة 😀 ( لبنان) ولازم اسميها كدة عشان ده حقها، ينفع تروح لبنان من غير فيزا مسبقة وتاخد الفيزا في المطار بس بشرط يكون معاك ٢٠٠٠ دولار امريكي كاش (هتوريهم للموظف هناك بس، مش لازم تصرفهم، يعني ممكن تستلفهم وترجعهم لما ترجع). هيدوك فيزا ١٥ يوم وبتتكلف ٢٠ دولار.

٢- الاردن: ٣٠ يوم وانت داخل

بونص: ممكن تاخد e-visa لتركيا من عن طريق الانترنت لو عندك فيزا شنجن او فيزا امريكا سارية، او سنك اقل من ٢٠ او اكبر من ٤٥ سنة و بتكلف ٢٠ دولار بتتدفع اونلاين، لمعلومات اكتر بص علي الموقع الرسمي من هنا

طيب دة كلام جميل جدا ايه المطلوب بيقي؟

المطلوب للدخول الي اي بلد لا تطلب فيزا مسبقة:

بنسبة ٩٠٪ وانت داخل البلد بيبقو عاوزين يتأكدوا انك هتخرج منها تاني 😀 فلازم يكون معاك الحاجات دي

١- تذكرة عودة لمصر

٢- اثبات اقامة (حجز اوتيل او دعوة من صديق او قريب، ويكون فيها البيانات واضحة لأنهم ممكن يتصلو بالاوتيل او الصديق يتأكدوا، فا بلاش تضرب ورقة 😀 )

٣- اثبات مالي (هاتصرف منين الفترة دي؟، فا بتوريهم فلوس كاش او كريدت كارد، بس ماتنساش القاعدة الاولي تبقي منطقي، ماتبقاش طالب تقعد في البلد ٧ ايام ومعاك ٥٠ دولار)

٤- خلي معاك صور شخصية بخلفيه بيضة زي بتاعت الباسبور (ساعات بيحتاجوها).

٥- فاكر موضوع انك تذاكر البلد؟ هتحتاج المذاكرة هنا لأن ساعات بتتسأل انت جاي تعمل ايه وهاتروح فين تعرف ايه عن البلد، ف تبقي جاهز.

كدة احنا غطينا البلاد اللي مش محتاجة فيزا مسبقة وممكن تروحها بكرة، انا عاوز اسمع رأيكم واستفسارتكم اكتبوها في التعليقات، المقال اللي جاي هنغطي البلاد اللي بتحتاج فيزا (و هنتكلم عن البلاد اللي فيزتها سهلة وهنتكلم عن الفيزا الشنجن) تابعونا 🙂